□ 陈绍谟

　　电视剧《繁花》当中有一个桥段是讲，汪小姐拍伊个顶头上司马屁，相帮金科长弄邮票，因为伊“勿懂经”，所以手忙脚乱，还少特（落特）一张外国人头邮票，惊慌失措。迪个辰光阿宝轧进茶水间里厢，从“糍饭团”上寻到了个张邮票，让汪小姐喜出望外，破涕为笑。

　　接下来阿宝对汪小姐进行了一番开导，教拨伊哪能从信封上揭开邮票的门槛，勒拉交谈当中，阿宝提到“淮海路上个‘伟明’”，外地人就“勿晓得”“伟明”是啥个麽事。“伟明”是上世纪五六十年代，辣淮海路跟思南路转弯角子上，一爿私人开额“集邮商店”，只有一开间的门面，沿街的橱窗里面，摆放了交关各式各样的邮票，琳琅满目，让人眼花缭乱，其中有新邮票，也有用过的“盖销票”，阿拉小八辣子，钞票邪气少，基本上只好买一眼眼“盖销票”，跟自家屋里厢的邮票配套。

　　记得当年，勒拉“伟明集邮商店”里，还经常买得到一种“袋装邮票”，好比现在的“盲盒”一样，勿晓得袋袋里厢装了啥个邮票，回到屋里厢，假使能够从袋袋里厢寻到一张邮票，可以跟自己的已经有个纪念邮票配套，就算上上大吉了，好比“额骨头碰到天花板”。

　　其余多下来的邮票，可以跟其他小朋友进行交换，互通有无，皆大欢喜，乐在其中。哎些辰光交换邮票也实行“等价交换”，两张4分邮票可以调一张8分邮票，两张寄航空信的一角头邮票，可以调一张寄挂号信的两角头邮票。

　　五十年代中苏关系密切，当时学“俄语”的中学生，开展与苏联中学生调纪念邮票的课外活动，好像是通过中国大使馆牵线，中国跟苏联个中学生交朋友，通过寄信，交换邮票。在这段辰光里厢，极大地丰富了中学生的课余生活。